ጠቅላይ ሚኒስትሩ ሚድሮክ በወርቅ ምርት ሥራ ለኢትዮጵያ የማዕድን ዘርፍ ከፍ ያለ አስተዋጽዖ አበርክቷል ብለዋል።
ሚድሮክ ኢንቨስትመንት ግሩፕ ሻኪሶ
በሻኪሶ ከተማ የሚገኘዉንና የሚድሮክ ኢንቨስትመንት ግሩፕ የማዕድን ዘርፍ አካል የሆነው ሚድሮክ ወርቅ ማዕድን በጠቅላይ ሚኒስትር ዶ/ር ዐቢይ አሕመድ ተጎብኝቷል።
ኢትዮጵያ በአፍሪካ የዕድሎች ማሳያ የሆነችና በአህጉሩም በፍጥነት በማደግ ላይ ካሉ ሀገራት አንዷ መሆኗን ጠቅላይ ሚኒስትር ዶ/ር ዐቢይ አሕመድ ገልፀዋል።
በወርቅ ክምችት የታደሉት የሻኪሶ እና ሰፊው የጉጂ አካባቢ የማዕድን ማውጣት ሥራው ዐቢይ ስፍራዎች ናቸው ሲሉም ጠቁመዋል።
ጠቅላይ ሚኒስትሩ በሻኪሶ በነበራቸው ጉብኝት በኢትዮዽያ መሪ የወርቅ ምርት ኩባንያዎች አንዱ የሆነውን የሚድሮክ ወርቅ የሥራ እንቅስቃሴንም ተመልክተዋል።
ተቋሙ በዘርፉ ቀዳሚ እንደመሆኑ በትልቅ አቅም እና ደረጃ በሚሰራው የወርቅ ምርት ሥራ ለኢትዮጵያ የማዕድን ዘርፍ ከፍ ያለ አስተዋጽዖ አበርክቷል ብለዋል።
በጉብኝቱ ላይ የማዕድን ሚኒስትር ኢንጂነር ሃብታሙ ተገኝ፣ የኦሮሚያ ክልላዊ መንግስት ፕሬዝዳንት አቶ ሽመልስ አብዲሳ፣ የሚድሮክ ኢንቨስትመንት ግሩፕ ዋና ስራ አስፈፃሚ አቶ ጀማል አሕመድ እና የማዕድን ዘርፍ ምክትል ዋና ስራ አስፈፃሚ አቶ ዱላ መኮንን፣ የግብርና ዘርፍ ምክትል ዋና ስራ አስፈፃሚ አቶ ፈለቀ ታደሰ፣ የማኑፋክቸሪንግ ዘርፍ ምክትል ዋና ስራ አስፈፃሚ አቶ አካለወልድ አድማሱን ጨምሮ ሌሎች ከፍተኛ የመንግስት የስራ ኃላፊዎች ተገኝተዋል።
